Naiskosi i Gitanas, ndodhet në skajin perëndimor të rrugës kryesore, në perëndim të shëtitores. Naiskosi me përmasa 13 x 7 m, i tipit me ante me dy kolona në ballë përbëhet nga hajati dhe naosi që komunikojnë me portë me njëra-tjetrën. Në brendi të tij janë gjetur statueta votive qeramike, qeramikë luksi dhe mbishkrimi në një fletë bronzi “EN ENTANOIE” (në Gitana).
Gjurmë tempujsh të tjerë, gjithnjë të përmasave të vogla, janë gjetur në Foinike dhe Symizë. Në Foinike është uluar pjesërisht një naiskos prostil, ndërsa në Gradishtën e Symizës një stilobat me gjurmë kolonash dhe terakota. Gjurmët më veriore të tempujve i përkasin një tempulli në Zgërdhesh, ku jashtë mureve rrethuese janë gjetur një shtatore mermeri dhe një gejzon me luan.