Shtresa më e hershme e përcaktuar gjatë sondazheve në pjesën më të lartë të qytetit i takon shek. VI p. Kr. dhe lidhet me një vendbanim protourban. Ajo përmban materiale të ngjajshme me ato të Klosit dhe Margëlliçit: qeramikë të prodhimit lokal të punuar pa çark dhe të zbukuruar me vizatim të tipit devollit; qeramikë të importuar, kryesisht kupa korintase dhe jonike.
Një shtresë intensive lidhet me lulëzimin e qytetit në shek. III-II p. Kr. dhe përfaqësohet nga qeramika e tipeve helenistike, e prodhuar nga zejtarët vendës. Një kategori interesante përfaqësojnë amforat e mëdha, të përdorura në nekropol, që kanë një interpretim lokal të formës, si dhe zbukurim krejt formal me figura të kuqe, apo aplikim relievesh.