I vendosur në anën veriore të sheshit. përballë buleuterionit, ky monument ka shërbyer për zhvillimin e shfaqjeve muzikore letrare, por edhe për mbledhje zyrtare. Vëllimi i tij ngrihej si një paralelpiped me gjerësi 14 m, gjatësi 20 m dhe lartësi rreth 10 m. Sipërfaqja e thjeshtë e mureve prej opus testaceum thyhej nga komizat prej guri gëlqeror që zbukuronin anët e tri hyrjeve të tij si dhe nga një geison masiv, i cili mbyllte muraturën nën çatinë. Në pamjen e brendshme monumenti ishte trajtuar si një teatër i vogël i mbështetur në faqen e kodrës me cavea të përbërë prej 16 radhësh, ku mund të uleshin rreth 300 shikues. Tri shkallë ngjiteshin midis radhëve për të lejuar lëvizjen e shikuesve. Gjithashtu, lëvizja e tyre nga dyert anësore drejt shkallëve bëhej në një shkallëzim të gjerë që ndante cavea-n nga pulpitum-i i ulët në orkestrën gjysmër-rethore. Hyrja ballore, më monumentale, e paraprirë nga një platformë me katër shkallë, shërbente për kalimin e artistëve apo oratorëve. Ndryshe nga trajtimi i thjeshtë i jashtëm, odeoni kishte nga brenda një pamje luksoze të krijuar nga veshja me mermer e cavea-s dhe e mureve. Monumenti përbën një ndërtim interesant për kombinimin e tipit helen të odeonit me teknikën romake të ndërtimit dhe datohet rreth mesit të shek.II m.Kr.