Murit perëndimor të odeonit i mbështetet një faltore e vogël me përmasa 5 x 5 m. Fasada e saj zbukurohej nga dy kolona jonike. Në pjesën e prapme. që shfrytëzonte një nishe të murit mbështetës të shek.IV p.Kr., gjenden tri bazamente për vendosje skulpturash. Në të dyja anët, dy bazamente të gjata mbanin ndoshta relieve të lidhura me funksionin e faltores. Faltorja mund të ketë qenë në funksion të odeonit, lidhur me kultin e Dionisit, apo të perandorit.