Tumat e Kolmarkajt

E para prej tyre gjendet mbi kulmin e kësaj kodre. Ndoshta me provën e gërmimit arrihet qendra e tumës, ngaqë këtu zbulohet një shtresë hiri dhe qymyri, që përfaqësojnë mbetjet e zjarrit. Mbi këtë shtresë dhe të mbrojtur nga gurë, të cilët ruajnë shenja zjarri të fiiqishëm, kishte një enë balte të pjekur, gjithashtu me gjurmë të dukshme të djegies së fortë dhe që nuk qe e mundur të nxirrej pasi ishte kthyer pothuaj në pluhur. Ndoshta përmbante hirin e kufomës së djegur, në rast se, prej shtresës së karbonizuar dhe prej faktit se nuk u gjendën eshtra, duhet të mendohet për djegie kufome. Unë megjithatë, për analogji me tumat e tjera, jam i mendimit se edhe në këtë rast bëhet fjalë për varrimin dhe se një gërmim i gjerë dhe i ngulmët mund të çojë në zbulimin e kufomës. Në mes të shtresës së karbonizuar ishin gjetur objektet vijuese:

• Copa qelibari me vrimë, në gjendje të keqe ruajtjeje, në numër 13. Ndoshta duhet të konsiderohen si rruaza gjerdani.
• Unazë gishti, prej argjendi, e thyer në dy copa, me gjurmë të konsumimit prej përdorimit.
• Numër i madh rruazash gjerdani të llojeve të ndryshme dhe materiali të ndryshëm, por në pjesën më të madhe prej bronzi.

Tuma tjetër gjendet pikërisht në një vend të sheshtë të vogël që gjendet mbi majën e kodrës. Kur u hap një gropë e vogël, dolën dhëmballët njerëzore dhe objektet e mëposhtëm:

• Majë heshte, prej hekuri, e dëmtuar në krye dhe në tubin e xhuntës së dorezës. Në zanafillë kishte masën rreth 30 cm dhe është e gjerë 5 cm. Në të dyja faqet dhe për së gjati është e përshkuar nga brinja përforcuese.
• Majë tjetër heshte në gjithçka e ngjashme me të mëparshmen edhe për sa i përket gjendjes së ruajtjes.
• Copa të ndryshme qeramike që nuk u mblodhën për shkak të thërmimit të tyre.